ప్రియమైన మిత్రులారా అందరికీ నమస్కారములు

యశ్వంత్ కుదరవల్లిబాటా ఆద్యక్షుడు

ప్రతిష్టాత్మకమైన మన 'బాటా' సంస్థ అధ్యక్ష హోదాను కల్పించినందుకు ముందుగా మీ అందరికీ నా ధన్యవాదములు. నిబద్ధత కలిగిన మన కమిటీ సభ్యుల సూచనలతో, మీ అందరి సహాయ సహకారములతో ఘనమైన తెలుగుభాషా సంస్కృతులను - మనం చేపట్టబోయే సాంస్కృతిక, సామాజిక, సేవా కార్యక్రమముల ద్వారా ప్రపంచానికి తెలియచేయటంలో విజయం సాధించగలమనే పూర్తి నమ్మకం నాకు ఉన్నది. బాటా 44 సంవత్సరాలను దిగ్విజయంగా పూర్తి చేసుకున్నదంటే అందుకు కారణం బే ఏరియాలో ఉన్న మన తెలుగువారు అందిస్తున్న సహాయసహకారాలతో పాటు పంచుతున్న ప్రేమాభిమానాలే కారణమని నేను విశ్వసిస్తున్నాను. బే ఏరియాలో నివసిస్తున్న వేలాది మంది తెలుగువారి ఆదరణ వల్ల ఈ రోజు మన సంస్థ అమెరికాలో ఉన్న ప్రముఖ కమ్యూనిటీ సంస్థలలో ఒకటిగా గుర్తింపు పొందిందని తెలియజేయటానికి సంతోషంగా ఉన్నది. ఈ శుభసందర్భంగా మీకు నేను మూడు ముఖ్యమైన విషయాలను విన్నపించదలచుకున్నాను.

• బాటా సంస్థ మీ, మన అందరిది. బాటా ఇప్పటివరకూ నిలదొక్కుకుంది అంటే దానికి ముఖ్యకారణం మీరే. బాటా నిర్వహించే ప్రతికార్యక్రమంలోనూ మీరందరూ పాల్గొనాలని, మనం అందరం కలిసి రకరకాల కార్యక్రమాలను జయప్రదంగా జరుపుకోవాలని విన్నవించుకుంటున్నాను. మనం మన సంస్థ స్పూర్తిని తర్వాతి తరాలకు సగర్వంగా అందించాలని కోరుకుంటున్నాను.
• మన సంస్కృతీ సంప్రదాయాలను గురించి తెల్సుకోవటానికి, పరిరక్షించుకోవటానికి బాటా సరైన వేదిక. మన ఈ వేదిక ద్వారా సాంస్కృతిక కార్యక్రమాలలో పాల్గొనాలని అనుకొంటే info@bata.org కు ఈ-మెయిల్ చేయండి
• బాటా నిర్వహించే కార్యక్రమాలకు భారీ ఎత్తున ఖర్చు అవుతున్నది. ఈ విషయమై మన స్పాన్సర్లు, దాతలు ఇస్తున్న సహాయ సహకారాలు మరవలేనివి. వారికి మనవంతు సహకారంగా వారి నిర్వహించే సేవలను ఆదరించటం, వారి గురించి మనకు తెలిసిన వారికి తెలియచేయటం మన బాధ్యతగా గుర్తిద్దాము. బాటా సంస్థ సభ్యులుగా పరిచయం చేసుకొని కొంత మంది స్పాన్సర్లు అందిస్తున్న discount లను పొందండి.

'బాటా' సంస్థ లక్ష్యాలు ఉద్దేశ్యాలు గురించి తెలుసుకోవటం కోసం www.bata.org/aboutus.html సైట్ కు లాగిన్ అవ్వండి. బాటా అభివృద్ధికి సంబంధించి మీ సూచనలను info@bata.org అనే ఈ-మెయిల్ కి పంపండి.